Скопје, 17 јануари (МИА) - На денот на Богојавлението - Водици во вторник, во 12:00 часот, поглаварот на Македонската православна црква г.г. Стефан од Камениот мост ќе ги освети водите на Вардар и ќе го фрли крстот, кој ќе се обидат да го фатат 168 верници.
Весникот „Вечер“, кој е организатор на манифестацијата „Водици 2010“ привршува со подготовките за одржување на овој традиционален настан што се одржува повеќе од две децении со благослов на Скопската епархија на МПЦ.
За безбедност на верниците во вода ќе се грижи специјалната единица на Министерството за внатрешни работи, специјалната единица за спасување на вода на Црвениот крст на Град Скопје, како и кајакарите на Кајакарската федерација на Македонија. За безбедноста пак на копно се ангажирани полицајците на полициската станица Центар, како и приватна агенција за обезбедување, а ангажирана е и лекарска екипа на Брза помош.
Сите учесници кои се пријавени за скок по крстот, како што велат организаторите, мора да се психофизички подготвени и затоа секоја година лекарите од Институтот за спортска медицина бесплатно ги прегледуваат пријавените.
За секој учесник е предвиден симболичен подарок, благодарница за учеството и едногодишна претплата на весникот „Вечер“, а најсреќниот пак што ќе успее да го фати крстот од „Горење“ ќе добие пакет производи, односно клима уред, фрижидер и телевизор. Традиционално скопскиот градоначалник Коце Трајановски ќе му додели златник, а градоначалникот на општина Центар Владимир Тодоровиќ-икона.
Вредна награда ќе додели и годинешниот кум на „Водици 2010“ Буцо Лазов кој на најсреќниот ќе му подари персонален компјутер.