Скопје, 24 јануари (МИА) - Премиерот Никола Груевски очекува да продолжат билатералните средби со неговиот грчки колега Јоргос Папандреу во обид да се најде решени за прашањето за името. Најави дека наскоро би требало да се оствари средба меѓу министерот за надворешни работи Антонио Милошоски и заменик шефот на грчката дипломатија Димитрис Друцас, а извесно е дека ќе има средба и меѓу премиерите на двете земји.
За очекувањата од разговорите, вели дека нема простор за големи надежи со оглед на сигналите што доаѓаат од Атина.
- За жал сигналите од Грција досега не оставаат преголем простор за надеж дека нешто ќе се случи, но да се надеваме дека до тогаш нешто ќе се промени и во свеста на генералното позиционирање на нашиот сосед, затоа што деновиве доаѓаат многу негативни сигнали во однос на нивната позиција. Но, еве преку средби, дискусии, преку изложување аргументи, преку изложување нови идеи можеби ќе дојде и до нешто ново, изјави Груевски одговарајќи на новинарски прашања по денешната промоција на новите преводи на странска стручна литература од областа на транспортот.
Министерството за надворешни работи на Република Македонија деновиве упати барање до официјална Атина за одржување билатерална средба на шефот на македонската дипломатија Антонио Милошоски и грчкиот заменик министер за надворешни работи Димитрис Друцас.
Доколку грчката страна позитивно одговори на барањето, како што потврдуваат за МИА во МНР, средбата ќе се одржи на 28 јануари, во Лондон, на маргините на Меѓународната конференција за Авганистан, на која ќе присуствуваат и Милошоски и Друцас.
Освен за разликите помеѓу двете држави околу спорот за името на Република Македонија, се очекува Милошоски и Друцас да разговараат и за подигнувањето на нивото на канцелариите за врски во амбасади во Скопје и Атина, за потпишување договор за избегнување двојно оданочување, како и за отворање нови гранични премини меѓу Република Македонија и Република Грција, иницијативи кои македонскиот министер за надворешни работи ги покрена на средбата со Димитрис Друцас кон крајот на минатата година во Атина, на средбата што ја имаа на маргините на министерската конференција на ОБСЕ.