Скопје, 22 февруари (МИА) - Под влијание на серија од влажни воздушни бранови од Медитеранот, до четврток ќе преовладува променливо облачно време со повремен дожд, а на планините со дожд и снег.
Врнежите ќе бидат позастапени во западните делови од земјата, каде во овој период се очекува локално да наврнат и до 20 литри на метар квадратен.
Управата за хидрометеоролошки работи соопшти дека во наредните два дена, имајќи ја предвид временската прогноза и очекуваните повремени врнежи од дожд и снег, се очекува благ пораст на водостоите, особено во југозападните подрачја на Македонија. Можни се нови одрони и слечишта и натамошни појави на поплавување, особено во Пелагонија и Струмичко поле.
Од четврток попладне ќе настапи период на стабилно и топло време.