Штип, 23 март (МИА) - Припадниците на специјалната единица „Волци“ на АРМ попладнево за само еден час го извлекоа телото на 53-годишниот Влатко Илковски од стариот колекторски систем на радовишкиот рудник „Бучим“.
По пет дена и по неколку прекинати операции за извлекување на телото, „Волците“ денеска со нивна специјална опрема ги поминаа 350-те метри од отворот на колекторскиот систем, каде што најпрво ја извлекоа едната количка со која се движел колегата на Илковски.
Заменик-менаџерот на рудникот „Бучим“ Николајчо Николов изјави дека „Волците“ од колекторот извадиле и дел од специјалната опрема на скопската фирма „Спидер платинум“. Останатиот дел од нивната опрема ќе се вади дополнително.
Во селото Тополница каде што се наоѓа стариот колекторски систем операцијата ја следеше и семејството на Илковски.
Причините за смртта на Илковски, кој во петокот вршеше ревизија на стариот колекторски систем на рудникот „Бучим“, ќе се знаат по обдукцијата.