Скопје, 30 март (МИА) - Во рамки на петтата акција „Ден на дрвото - засади ја својата иднина“ денеска дрвца се засадуваат и на пограничните региони со соседните земји.
Декоративни, листопадни и зимзелени садници на меѓуграничниот простор заеднички ќе садат припадници на граничните полиции и царинските управи од Македонија и соседните држави.
Садници ќе бидат засадени на четирите гранични премини со Албанија - Блато, Ќафасан, Свети Наум и Стење, на пограничните региони Пелинце и Табановце со Србија, и кај Долно Блаце со Косово.
Дрвца се засадуваат и на граничните премини Деве баир, Ново Село и Делчево со Бугарија, како и со соседна Грција, на Богородица, Меџитлија и Стар Дојран.
Заради побрз проток на патници и возила се спроведува специјален режим на поминување на граничните премини.
Градоначалниците на Ново Село, Василево, Босилово и Берово ќе одат во општина Струмјани во Бугарија, и со тамошниот градоначалник ќе засадат околу 50-ина садници, а потоа ќе се враќаат и ќе засадат дрвца и на македонска територија.
Во Благоевград и Ќустендил, пак, дрвца ќе засадат градоначалникот на Крива Паланка со неговите колеги од тие бугарски градови, а заеднички придонес во акцијата ќе дадат и на територијата на Македонија.
Заеднички, во пограничниот регион на Македонија и на Албанија, дрвца ќе садат градоначалниците на Ресен и на Пустец, Мала Преспа.
Градоначалниците на Дебар и на Маврово-Ростуше, пак, одат во Пешкопеја каде што ќе засадат дрвца со тамошниот градоначалник. Заедно со косовски претставници дрвца ќе бидат засадени и на Блаце.
Под слоганот „Растеме заедно“ на 100 локации во Македонија денеска треба да бидат засадени 7,5 милиони садници.