Скопје, 13 април (МИА) - Претседателот на Република Албанија, Бамир Топи по покана на македонскиот претседател Ѓорге Иванов, утре и задутре ќе престојува во дводневна посета на Република Македонија.
За време на посетата, претседателот Топи покрај тет-а-тет средбата со неговиот домаќин претседателот на Република Македонија, Ѓорге Иванов, ќе се сретне и со претседателот на Собранието Трајко Вељаноски и со премиерот Никола Груевски.
Како што е најавено, Топи утре на 102-та седница ќе им се обрати и на пратениците во македонското Собрание.
Шефовите на двете држави, Иванов и Топи, ќе присуствуваат и на македонско-албанскиот бизнис форум што ќе се одржи во Скопје, со цел да се прошират економските односи меѓу Македонија и Албанија.
На агендата на албанскиот претседател Топи се и средби со лидерите на ДУИ, ДПА и на НД, Али Ахмети, Мендух Тачи и Имер Селмани, како и со претседателот на СДСМ, Бранко Црвенковски.
Делегацијата, предводена од претседателот Топи, ќе ги посети и општините Тетово и Дебар, каде се очекува да биде прогласен за почесен граѓанин.