Скопје, 5 мај 2010 (МИА) - Бугарскиот министер за надворешни работи Николај Младенов од денеска ќе престојува во дводневна официјална посета на Република Македонија.
Покрај разговорите со својот домаќин, министерот за надворешни работи Антонио Милошоски, шефот на бугарската дипломатија ќе се сретне и со премиерот Никола Груевски и со претседателот на Собранието Трајко Вељаноски.
Во фокусот на разговорите меѓу двајцата министри за надворешни работи ќе бидат билатералните односи, особено можностите за продлабочување на економската соработка и напредокот во процесот на европското и евроатлантското интегрирање на Република Македонија. На средбите ќе бидат опфатени и теми од мултилатералната сфера, имајќи го предвид претстојното претседавање на Република Македонија со Советот на Европа, како и прашања од регионален карактер со оглед на тоа што министерот Младенов во наредните денови ја продолжува турнејата по балканските земји.
За време на посетата, предвидено е министерот Младенов да отвори ликовна изложба во Градската библиотека „Браќа Миладиновци“, да ги одликува спасителите во несреќата со бродот „Илинден“ во Охридското Езеро, а ќе има средба и со претставници на невладиниот сектор во Македонија.
Во рамки на дводневниот престој, министерот Младенов ќе го посети и Тетово каде што на Штуловиот универзитет ќе одржи предавање пред студентите и претставници на дипломатскиот кор.