Скопје, 20 мај 2010 (МИА) - Шефот на македонската дипломатија и претседавач на Комитетот на министри на Советот на Европа Антонио Милошоски денеска се сретна со претседателот на Парламентарното собрание на СЕ Мевлут Чавушоглу.
На средбата одржана во рамките на посетата на претставници на Парламетарното собрание на Советот на Европа на Македонија, уште еднаш беа претставени приоритетите на македонското шестмесечното претседавање со најстарата паневропска организација со посебен акцент на меѓукултурниот и меѓуверски дијалог, како и на реформите на Судот за човекови права во Стразбур.
Претседателот на ПС на СЕ Чавушоглу ги пофали напорите на македонското претседателство со СЕ и истакна дека блиската соработка меѓу Комитетот на министри и ПС е единствениот начин за успешно реформирање на Советот на Европа.
Чавушоглу и Милошоски пред три дена објавија заедничка изјава која се однесуваше на состојбата со човековите права во Белорусија, притоа повикувајќи ги белоруските власти да се откажат од извршувањето на изречените смртни казни во нивниот судски систем.
Посетата на претседателот на Парламентарното собрание Чавушоглу продолжува денеска и утре при што ќе има средби со највисоките државни функционери, како и заедничка сесија на Постојаниот комитет на кој ќе учествуваат околу 70 пратеници од многу земји членки на СЕ.