Скопје, 31 мај 2010 (МИА) - Меѓу 700. патници на бродовите кои беа нападнати изутрината од израелските специјалци имало и државјани на Македонија, пренесува арапската телевизиска мрежа „Ал Џезира“.
Во хуманитарниот конвој биле претставници на триесеттина земји, меѓу кои Арапи, Евреи, Турци, Французи, Германци, Норвежани, Руси, Шпанци, Канаѓани, Американци, Британци..., но и луѓе кои зборувале на македонски и на албански јазик, наведува „Ал Џезира“.
Помошта од Македонија била организирана преку турската хуманитарна организација ИХХ.
Претходно турските медиуми, повикувајќи се на список на ИХХ, објавија дека на еден од бродовите биле и тројца македонски државјани
МНР засега нема официјална потврда дали во конвојот имало Македонци и каква е нивната судбина, но информира дека македонскиот амбасадор во Израел Пајо Авировиќ претпладнето е повикан на разговор во израелското МНР. На брифингот не биле презентирани конкретни информации за учество на македонски државјани во нападнатиот хуманитарен конвој.
Најмалку 19 луѓе загинаа кога израелската морнарица го пресретна конвојот од шест бродови со 10.000 тони хуманитарна помош за Палестинците кој тргнал од Турција за Појасот Газа.
Според израелските медиуми, специјалците во обид да ги запрат се качиле на бродовите каде што наишле на жесток отпор на пропалестинските активисти.