Скопје, 8 јуни 2010 (МИА) - Почесниот претседател на ВМРО-Народна партија и поранешен премиер Љубчо Георгиевски смета дека во Македонија ќе има предвремени парламентарни избори во октомври или ноември доколку не се најде решение за спорот за името.
- Октомври, ноември е пореално, затоа што поминува рокот од Европска унија, во октомври поминува рокот од НАТО. Според мене треба да има некаква логична завршница на таа приказна, не може оваа работа да се влече. Во октомври ќе се знае дали ќе има решение или не, рече Георгиевски денеска на прес-конференција
Според Георгиевски, вонредните избори зависат од ДУИ, а владејачката ВМРО-ДПМНЕ не е за избори.
Не очекува скоро решавање на спорот за името, кој смета дека Владата има капацитет да го реши, но, како што истакнува, самата си направила ќорсокак и не прави ништо за да излезе од него.
Почесниот претседател на ВМРО-НП оцени и дека Македонија ќе профитирала со 400 милиони евра, ако Народната банка пред три месеци претворела 1,5 милијарди евра од девизните резерви во злато, како што предложи тој неодамна.