Брисел, 17 јуни 2010 (МИА) - Македонија и Грција остануваат посветени и го поддржуваат процесот што го води медијаторот Метју Нимиц во рамките на ОН. Постои волја и подготвеност за изнаоѓање заемно прифатливо решение за билатералниот спор за името, кое нема да нанесе штета на ниту една од двете страни.
Ова го истакнале премиерите на двете земји Никола Груевски и Јоргос Папандреу на денешната получасовна средба во Советот на ЕУ.
На средбата што беше договорена на заедничка иницијатива во духот на веќе воспоставената пракса на билатерални контакти на премиерско ниво, како што информира кабинетот на Груевски, биле разменети мислења и информации за повеќе прашања од заеднички и регионален интерес.
Двајцата премиери, меѓу другото, разговарале и за предизвиците поврзани со светската економска криза, европските и евроатлантските интеграции на земјите од регионот.
Ова е петта тет-а-тет средба Груевски-Папандреу. Претходните четири беа оценети како корисни за зголемувањето на довербата и разбирањето меѓу двете страни, но не донесоа напредок во решавањето на билатералниот спор за името.