Скопје, 21 јуни 2010 (МИА) - Претседателот на Чешката Република Вацлав Клаус денеска и утре престојува во официјална посета на Република Македонија.
Македонскиот претседател Ѓорге Иванов со највисоки државни почести ќе го пречека неговиот чешки колега, по што ќе следуваат разговори помеѓу двајцата шефови на држави и делегациите на двете земји. Планирано е делегациите на ресорните министерства од двете земји да потпишат договор за соработка во областа на образованието.
Предвидено е исто така чешкиот претседател Клаус денеска да се сретне и да има работен ручек со премиерот Никола Груевски.
Во Собранието на Република Македонија чешкиот претседател ќе оствари средба со пратениците-членови на комисиите за надворешна политика, европски прашања, економски прашања, образование и Националниот совет за евроинтеграции.
Двајцата претседатели Ѓорге Иванов и Вацлав Клаус утре ќе имаат обраќања на македонско-чешкиот бизнис форум што ќе се одржи во Скопје.
Клаус исто така ќе има средба со лидерот на СДСМ и поранешен претседател Бранко Црвенковски, со првите луѓе на верските заедници во земјата, како и со градоначалниците на Скопје, Тетово и Сарај.
Чешкиот претседател ќе ја посети и хидроцентралата Матка која ја раководи чешката компанија „Хидропол“ и Универзитетот на Југоисточна Европа во Тетово.