Стразбур, 21 јуни 2010 (МИА) - Претседателот на Парламентарното Собрание на Советот на Европа, Мевлут Чавушоглу ја поздравува соработката со Македонското претседателство со Комитетот на министрите на Советот на Европа.
Заблагодарувајќи се за убавиот пречек и прием на Парламентарното Собрание на СЕ во Скопје на 20 и 21 мај 2010, првиот човек на паневропската асамблеја Мевлут Чавошоглу нагласи дека програмата на Македонското претседателство во добар дел ги покрива приоритетите за работа кои тој ги има како претседател со ПС на СЕ.
- Зацврстување на човековите права, охрабрување на интеграцијата со почитување на разноликоста, како и акцентот врз меѓурелигискиот и меѓукултурниот дијалог, без да се заборави на промоцијата и вклученоста на младите, рече Чавушоглу поздравувајќи го македонскиот шеф на дипломатијата Антонио Милошоски пред неговиот настап пред ПС на СЕ.
- Посебно сум среќен што под ваше раководство, позитивната соработка што се воспостави меѓу Комитетот на министрите и ПС на СЕ за време на претходното претседателство (швајцарскиот) посебно се зацврсти, додаде претседателот на ПС на СЕ обраќајќи му се на Милошоски.
Ова според него е посебно важно, во моментот кога Советот на Европа треба да се прилагоди на нова реалност и предизвици за да ја зачува својата значајна политичка улога.