Истанбул, 23 јуни 2010 (МИА) – Македонија и Грција со посредство на медијаторот Метју Нимиц ќе продолжат со напорите да бараат понатамошни идеи за решение на името кое не би причинило штета ниту за Македонија, ниту за Грција, како и за македонските граѓани, бидејќи тие ќе одлучат на референдум, изјави премиерот Никола Груески по завршувањето на Самитот на шефови на држави и влади на Процесот на соработка на земјите од Југоисточна Европа во Истанбул.
По денешната средба со грчкиот премиер Јоргос Папандреу, Груевски смета дека Грција конечно сфатила оти од македонска страна постои желба за решавање на проблемот. Папандреу, како што посочи, јавно кажа во неговото обраќање дека двајцата сакаат да дојдат до решение и тоа е добар сигнал од таа гледна точка.
Груевски, јави известувачот на МИА, вели дека барем кај неговиот грчки колега веќе нема дилеми оти македонската страна сакаме да се реши проблемот, бидејќи во минатото постоеле такви дилеми.
- Мислам дека Папандреу отворено зборува дека тој и јас, нашето и нивното раководство сакаме да дојде до договор, но се уште трагаме по решение, се разбира под чадорот на мандатот на Метју Нимиц. Се обидуваме да најдеме решение што нема да им наштети на двете држави, ниту на Грција, ниту на интересите на Македонија, рече македонскиот премиер.
Одговарајќи на новинарско прашање дали се очекува наскоро конкретен предлог од Нимиц, истакна дека тоа зависи од медијаторот и оти тој има зачестени консултации со двете страни.
- Веројатно трага по решение прифатливо за двете страни за кое би бил посигурен дека нема да биде одбиено. Не можам да предвидам ништо, изјави Груевски.
За излагањето на Папандреу дека се покренати иницијативи и нови напори, тој рече дека времето ќе покаже дали е така и оти не преостанува ништо освен да се верува дека тоа што го говорел, и го мислел.
Груевски смета дека секоај средба е корисна бидејќи има почеста комуникација, а со тоа се зголемуваат шансите да се најде некакво решение.
- Се подобруваат човечките односи, што влијае и на подобрување на односите меѓу земјите, а кога има подобра атмосфера полесно може да се дојде до решение, посочи шефот на македонската Влада.
Денешната беше шеста тет-а-тет средба Груевски – Пандреу од октомври минатата година. Претходата беше на 17 овој месец во Брисел. Досегашните средби беа оценети како корисни за зголемувањето на довербата и разбирањето меѓу двете страни, но не донесоа напредок во решавањето на билатералниот спор за името.