Призрен, 26 јуни 2010 (МИА) - Претседателот на Република Македонија Ѓорге Иванов денеска ќе учествува на регионалната лидерска средба во Призрен, заедно со шефовите на држави на Косово, Црна Гора и Албанија, Фатмир Сејдиу, Филип Вујановиќ и Бамир Топи.
Главни теми на кои ќе разговараат претседателите се билатералните односи, економската соработка и евроинтеграциските перспективи.
Шефот на државата Иванов претпладне ќе има билатерални средби со своите колеги Сејдиу, Вујановиќ и Топи. По свечениот ручек ќе се одржи пленарен состанок, а мини балканската претседателска средба ќе заврши со прес-конференција.
Иванов утре ќе се сретне со претставници на Македонско-горанската заедница.
На средбата во Призрен не присуствува српскиот претседател Борис Тадиќ. Коментирајќи ја средбата во Призрен, на која српскиот претседател Тадиќ не е поканет, државниот секретар во српското Министерство за Косово и Метохија Оливер Ивановиќ вчера изјави дека секоја средба, организирана од косовските власти, го губи значењето „без главниот фактор на Балканот- Србија“.
Минатата година ваква регионална средба се одржа во албанскиот град Валона.