Скопје, 29 јуни 2010 (МИА) - Полицискиот службеник Б.В. непотребно се впуштил во вербална расправија со снимателот со што постапил спротивно на Упатството за начинот на однесување и меѓусебните односи на полициските службеници. Ќе биде поднесен предлог за покренување постапка за утврдување на одговорност до надлежната комисија за отказ во МВР против вработениот во Одделот за обезбедување на лица и внатрешно обезбедување на објекти.
Ова е заклучокот на Секторот за внатрешна контрола и професионални стандарди (СЦКПС) при МВР донесен по спроведената истрага во врска со инцидентот што се случи вчера меѓу лице од обезбедувањето на премиерот Никола Груевски и снимателот од телевизијата ЕРА пред почетокот на средбата на лидерите на партиите од коалицијата „За подобра Македонија“.
Според СВКПС, Б.В. постапил спротивно на Упатството, со тоа што во службените односи со граѓаните не се однесувал пристојно, одмерено, објективно, и коректно и не ја почитувал личноста, достоинството, правата и слободите на граѓаните. Не го чувал својот углед, како и угледот на полицијата, се појаснува во денешното соопштение од МВР.
Во врска со наводите во медиумите дека снимателот бил удиран од обезбедувањето, примена на физичка сила не потврдил ниту оштетениот, ниту новинарите со кои е контактирано, а учествувале во изготвувањето на извештаите.
Во соопштението се подвлекува дека МВР го осудува секое непрофесионално постапување на поединци со кои се нарушува угледот на полицијата и во најкус можен рок против нив ќе бидат изречени соодветни санкции од надлежната комисија.