Битола, 16 јули 2010 (МИА) - СВР Битола денеска поднесе кривични пријави, а истражен судија им одреди 30-дневен притвор на Томе, Цане и Душко Илиевски кои се осомничени за недозволено производство и пуштање во промет на наркотични дроги, психотропни сустанци и прекурсори, казниво според член 215 од Кривичниот законик на Република Македонија.
- Тие во текот на 2010 неовластено засадиле „канабис сатива“, го одгледувале, обработувале и со помош на распрскувачки систем го наводнувале. 203-те садници им се одземени, а пријавените се предадени пред истражен судија, изјави Ѓоко Стрезовски, портпарол на СВР Битола и потврди дека во изминатите години имале пријави од граѓани дека низ нивите има „канабис сатива“, по што растението организирано се корнело и со записник се уништувало.
Распитот во Основниот суд - Битола на осомничените фармери од Битола, се одвиваше во присуство на нивниот адвокат Борис Кондарко кој на средбата со новинарите посочи дека „ова се случува затоа што Душко застанал на страната на земјоделците и млекарите кои се побунија против измамата од страна на владата“. - Сето ова е бесмислено и политички мотивирано, смета Кондарко.