Велес, 22 јули 2010 (МИА) - Директорот на Велешката болница д-р Ванчо Граматов во врска со случајот со родилката која почина изутрината на Гинеколошкото одделение изјави дека нејзиното породување почнало нормално, но подоцна имало компликации и таа паднала во безсознание.
На 45-годишната Лиле Мајсторова тоа и било трето породување. Медицинскиот тим предводен од искусниот гинеколог д-р Атанас Василев според д-р Граматов, цели три часа правел напори да ја спаси родилката.
И покрај целата укажана помош таа починала во 4 часот изутрината, а откако претходно родила здраво машко дете кое итно е пренесено на Клиниката за детски болести во Скопје.
Телото на починатата родилка Лиле Мајсторова е пренесено на обдукција во Судска медицина во Скопје каде стручњаците по оваа област треба да ја утврдат точната причина за смртта на родилката.