Скопје, 16 август 2010 (МИА) - Учебникот Општество ќе биде повлечен, беше решено вечерва на состанокот на министерот Никола Тодоров со новиот тим рецензенти кои извршија суперрецензија на целата содржина на изданието.
Покрај грешките во делот за личности од македонската култура, четиричлениот тим утврдил и други пропусти во учебникот за петто одделение, така што тој ќе биде повлечен и ќе се печати нов, а тоа ќе го чини Министерството за образование и наука околу 1 милион денари.
- Учебникот по општество го повлекуваме не само заради грешката во делот на културата на 42 страница, туку зашто овој тим констатираше и голем број дополнителни грешки и беше едногласно констатирано дека ќе се направи голема штета доколку тој стане учебник за петто одделение, рече министерот Тодоров по состанокот.
Новиот тим рецензенти ќе одлучи од кој учебник ќе учат петтоодделенците, дали овој учебник со ревидирана содржина или второрангираниот, кој од рецензентите беше исто така високо оценет.