Скопје, 18 август 2010 (МИА) - Во касарната „Илинден“ во Скопје денеска ќе се одржи централната свеченост по повод 18-ти Август – Денот на АРМ.
На свеченоста ќе присуствуваат претседателот на Република Македонија и врховен командант Ѓорге Иванов, претседателот на Собранието на Република Македонија Трајко Вељаноски, поранешните претседатели на Република Македонија, министерот за одбрана Зоран Коњановски, началникот на ГШ на АРМ генерал-потполковник Мирослав Стојановски, министри во Владата на Република Македонија, пратеници во Собранието на Република Македонија, поранешни министри за одбрана и началници на ГШ на АРМ, пензионирани генерали на АРМ, високи гости од повеќе институции во Република Македонија, амбасадорите, воените аташеа, високи воени претставници акредитирани во Република Македонија и други високи гости.
Свечениот строј, по овој повод, ќе го сочинуваат ешелони од повеќе единици на АРМ, ГШ на АРМ, како и припадниците на 2. механизирана пешадиска бригада кои неодамна се вратија од мисијата ИСАФ во Авганистан.
Како што е најавено, со пригоден говор на присутните ќе им се обратат претседателот на Република Македонија Иванов и министерот за одбрана, Коњановски.
На свеченоста е предвидена и церемонија за унапредување на офицери на АРМ во чин полковник.
По завршувањето на свеченоста од касарната „Илинден“ во чест на Денот на АРМ, ќе се изврши почесна стрелба со испалување на 10 плотуни од 12 артилериски орудиа.