Болницата за гинекологија и акушерство во Чаир преименувана во „Мајка Тереза“

Скопје, 18 август 2010 (МИА) - Владата, на предлог на Министерството за здравство на вчерашната седница донесе одлука, Специјалната болница за гинекологија и акушерство во Чаир да го носи името „Мајка Тереза“.

Преименувањето на болницата, како што соопшти Министерството за здравство, доаѓа во време кога целосно ќе се реконструира, догради и модернизира со што ќе го зголеми капацитетот, а ќе биде подигнат и квалитетот на здравствените услуги што ги нуди на граѓаните.

Реконструкцијата предвидено е да трае 12 месеци и е дел од првата фаза од проектот за реконструкција, доградба и изградба со кој се опфатени 20 јавни здравствени установи во државата. 

По извршувањето на предвидените градежи зафати, родилиштето ќе добие нови модерни родилни, двокреветни соби и апартмани по најновите стандарди, со што родилките ќе добијат посовремен третман и попријатен престој во болницата, стои во соопштението.

Одлуката за преименување на болницата се совпаѓа со одбележувањето на 100 годишнината од раѓањето на Мајка Тереза.  

Специјалната болница за гинекологија и акушерство во Чаир е второ по големина родилиште во земјава, со над 3.000 породувања годишно.