Скопје, 23 август 2010 (МИА) – Демократската обнова на Македонија ја поддржува одлуката на Министерството за образование и наука за ревизија на учебниците за основното образование, но смета дека најавените рокови од 30 дена не се реални.
Ова на денешната прес-конференција го соопшти портпаролот на ДОМ Тони Ристов и потенцира дека една од главните причини зошто учебниците се со ваков квалитет се нереално кратките рокови од еден до два месеци за ревизијата.
- Треба да се размисли за начинот на избор на автори, рецензенти и нивно адекватно наградување. Македонија има добри педагози и добри автори, но секогаш треба да се овозможи најдобрите да бидат избрани и наградени, рече Ристов.
Тој рече дека за сериозна ревизија потребно е да се утврди јасна и прецизна методологија за избор на ревизори, начин на ревизија и реален рок таа да се изврши квалитетно.
Според ДОМ, учебниците во основното образование се со различен квалитет и со многу недостатоци, методолошки, материјални и лекторски и терминолошки не се усогласени на возраста на децата.