Скопје, 26 август 2010 (МИА) - По ревизијата на учебниците за основно ќе се врши проверка и на тие за средните училишта, а тој процес ќе оди полесно, најавува министерот за образование и наука Никола Тодоров.
Тој се надева дека по случувањата со учебникот по „Општество“ и грешките пронајдени во други учебници сите професори и тимови кои се формираат за ревизија ќе направат солидни учебници.
- Учебниците за средно образование ќе одат во вториот циклус и таму ќе оди веројатно полесно целата ревизија, имајќи предвид дека 20 години и повеќе во Република Македонија недостасуваат учебници за средно образование, изјави денеска министерот Тодоров.
Оваа година, додаде Тодоров, направивме сериозен увид за поправање на оваа неправда којашто сите сме ја имале. - И јас сум еден од тие генерации ко јшто се образувал без никакви учебници во средно стручно образование. Сум завршил економско-правна струка во „Васил Антовски - Дрен“ и се надевам дека во тој дел исто така ревизијата ќе оди добро, рече министерот за образование.
На новинарско прашање дали ќе поднесе оставка по последните случувања со учебниците Тодоров изрази жалење, што, како што рече, „Македонија станала држава во која секој секого напаѓа“.
- Македонија стана држава во која секој секого напаѓа и во која секој за себе мисли дека е најквалитетен, најкомпетентен и најповикан за определена работа и дека другиот е понеквалитетен и понеповикан да ја заврши таа работа. Но, јас демократијата ја разбирам како поле за судир на конфликти, идеи и политики, а не како мегдан за судир на суети. Тоа е веројатно и дефиницијата за македонското самоуништување, изјави Тодоров.