Скопје, 22 септември 2010 (МИА) - Поранешниот премиер и актуелен почесен претседател на ВМРО-НП Љубчо Георгиевски денеска преку отворено писмо до претседателот на ВМРО-ДПМНЕ и премиер Никола Груевски, бара да не се опструира спроведување на Законот за лустрација и тој да се применува доследно и принципиелно.
Георгиевски вели дека ВМРО-ДПМНЕ од позиција на власт има можност да расчисти некои контроверзии во однос на наводните соработници на УДБА и ДБК инфилтрирани во партијата. Потсетува дека кога пред неколку години Стојан Андов ја промовирал идејата за лустрација очекувал ВМРО-ДПМНЕ да ја искористи шансата и да ги раскринка таквите структури во СДСМ, но и во сопствените редови. Таквите очекувања, додава, не се оствариле. Додека СДСМ декларативно и громогласно се противела на лустрацијата, владејачкото парламентарно мнозинство правело се процесот да се пролонгира и опструира, пишува Георгиевски.
Вели дека е непријатно изненаден и од, како што наведува, договорот меѓу ВМРО-ДПМНЕ и ДУИ да се запре постапката за двајца нивни пратеници кои најверојатно биле соработници на тајните служби.
Поранешниот претседател на ВМРО-ДПМНЕ Георгиевски во отвореното писмо до актуелниот партиски лидер Груевски, пишува и дека е изненаден од постапките на партијата и оти не му се јасни мотивите за заштита на луѓето кои биле соработници на тајните служби.
Забележува и на, како што вели, обидите за прекројување на историјата на партијата на прославата по повод 20 години од формирањето на ВМРО-ДПМНЕ.