Стразбур, 3 октомври 2010 (МИА) - Од 4 до 8 октомври во Стразбур ќе се одржи есенската сесија на Парламентарното Собрание на Советот на Европа. На дневниот ред меѓу другот е ургентната дебата за „неодамнешното засилување на безбедносните дискусии во Европа – случајот со Ромите“, јави дописникот на МИА од Франција.
Како што е најавено од службата за печат на паневропската организација, еден од настаните што треба да ја одбележат оваа сесија е обраќањето на претседателот на Владата на Република Македонија Никола Груевски и министрите за надворешни работи Антонио Милошоски во својство на претседавач со Комитетот на Министрите, и неговиот германски колега Гидо Вестервеле.
Македонскиот шеф на дипломатијата пред парламентарците од 47-те земји на Советот на Европа во понеделник ќе треба да ги претстави активностите на Комитетот на министрите меѓу двете сесии.
Милошоски покрај неговите активности како претседавач со Комитетот на министрите престојот во Стразбур ќе го искористи и за повеќе работни средби, од кои меѓу најавените е таа со германскиот шеф на дипломатијата Гидо Вестервеле.
Премиерот Никола Груевски, според програмата пред ПС на СЕ ќе треба да говори в четврток.
Груевски е трет македонски премиер кој ќе говори пред ПС на СЕ.
ПС на СЕ ќе расправа и за други прашања, како борбата против екстремизмот, човековите права и претпријатијата и ќе разгледа извештајот посветен на пристапот на жените кон легалните медицински услуги, правата на децата.
Пред ПС на СЕ ќе биде претставен и извештајот за активностите на Организацијата за економска соработка и развој, на Европската банка за реконструкција и развој и на Банката за развој на Советот на Европа. Парламентарците од 47 земји членки на Советот на Европа во Стразбур ќе треба да ја одбележат и 60-годишнината од Европската конвенција за човекови права.