Вашингтон, 5 октомври 2010 (МИА) – Македонија заслужува да биде членка на НАТО, изјави американскиот конгресмен Роберт Адерхолт од Републиканската партија, по синоќешната средба во Вашингтон со македонскиот министер за одбрана Зоран Коњановски, јави известувачот на МИА.
Адерхолт беше еден од иницијаторите на писмото за поддршка на Македонија за влез во НАТО потпишано од 19 конгресмени што во петокот беше испратено до американскиот претседател Барак Обама и други официјални претставници на САД.
Конгресменот Адерхолт рече дека многу е важно за Македонија да се знае за придонесот што таа го дава не само во Авганистан, туку и за ширење на демократијата и слободата.
- Многу е важно да се знае. Дел од членовите во Конгресот, но и американските граѓани не знаат каков придонес Македонија прави за слободата и демократијата во светот, особено во Авганистан, изјави Адерхолт.
Коњановски во рамките на посетата на САД оствари средба и со сенаторот Патрик Леахи, кој поднесе Резолуција за Македонија во Сенатот. Сенаторот од Вермонт Леахи му ја предаде Резолуцијата на министерот Коњановски и притоа истакна дека поддршката од САД и од него, како сенатор е јасна и недвосмислена и оти Република Македонија треба да биде вреднувана согласно сето она што го има направено изминатиот период. Тој посебно се осврна на македонското учество во мировните мисии и улогата што ја има во нив.
Министерот за одбрана се сретна и со помошникот - државен секретар во Бирото за Воено - политички прашања на Стејт Департментот Анрев Шапиро и имаше работен ручек со претставници на администрацијата од Стејт департментот и Пентагон.
- Секако дека сенаторите и конгресмените се многу битни за создавањето на големата слика за Република Македонија и ние треба да работиме на тоа да создаваме нови пријатели, изјави Коњановски.
Претходно министерот за одбрана имаше обраќање пред Стратешката сесија на Атлантскиот совет на САД. Членовите на советот, според Коњановски најмногу се интересирале за позицијата на Македонија во однос на прашањето за името, но и за состојбите на Балканот и приближувањето на земјите од регионот до Алијансата.
Посетата на САД на министерот Коњановски завршува денеска со средбите со првиот човек на Националната гарда на САД и со заменик-претседателот на Националниот одбранбен универзитет, амбасадорот Томас Крајески, по што ќе положи венец на гробот на незнајниот јунак на националните гробишта во Арлингтон.
Доцна попладне по локално време министерот заедно со македонската делегација во која е и началникот на Генералштабот на АРМ Мирослав Стојановски и државниот секретар Петар Есмеров ќе отпатува за Отава каде што утре ќе се сретне со канадскиот министер за одбрана Питер Меккеј.