Штип, 6 октомври 2010 (МИА) - Мислам дека позицијата за тоа прашање е општо позната. НАТО беше многу јасен на Самитот во Букурешт и на ланскиот во Стразбур и Кил. Позициите и очекувањата се дека Македонија ќе добие покана за полноправно членство во НАТО веднаш штом се реши прашањето за името. Се надеваме дека тоа ќе се случи.
Ова го изјави американскиот амбасадор Филип Рикер во Штип, одговарајќи на новинарско прашање дали САД ќе извршат притисок врз Грција да попушти во тврдите позиции за името на ноемврискиот Самит на НАТО во Лисабон.
Тој денеска беше во посета на Првата механизирана пешадиска бригада во штипската касарна „Јане Сандански“. По посетата Рикер истакна дека од страна на единицата бил запознаен со демографската и географската поставеност на гарнизонот, како и со мисиите на македонските војници во Авганистан.
Заменик командантот на Првата механизирана пешадиска бригада и делегацијата од Генерал штабот на АРМ на амбасадорот Рикер му го презентираа кабинетот по англиски јазик, каде што професионалните војници се едуцираат, а воедно му беа покажани и тактичко-техничките достигнувања со приказ на вооружувањето и техниката, кои се формациски состав на единицата.
Првата механизирана пешадиска бригада на амбасадорот Рикер му подари голема плакета со логото на бригадата „Скорпија“.