Стразбур, 7 октомври 2010 (МИА) - Премиерот Никола Груевски денеска ќе има обраќање пред Парламентарното собрание на Советот на Европа во рамките на есенската сесија на ПССЕ.
Предвидени се и повеќе билатерални средби, меѓу кои и со претседателот на ПССЕ Мевлут Чавашоглу, како и со претседателот на Европскиот суд за човекови права Жан-Пол Коста.
Премиерот Груевски синоќа во Советот на Европа ја отвори изложбата на слики насловена „Културата е значајна - места во Југоисточна Европа вклучени во светското наследство на УНЕСКО“, што ја организираа постојаните мисии на Македонија, Австрија, Албанија, БиХ, Србија, Хрватска и Црна Гора.
- Во секој дел на Европа постои богатство кое не потсетува што е наше, но исто така и што е универзално што не зближува и поврзува. Како што има истакнато еден од креаторите на Европската унија Жан Моне „ако можам да почнам повторно, би почнал со културата“, јас само ќе додадам дека од културата исто така треба да продолжиме, истакна Груевски на отворањето.
Тој, како што јави известувачот на МИА од Стразбур, нагласи дека обврската кон која сите треба да се посветиме во иднина е да продолжиме по патот на создавање вредности и надградување на постоечките со нови дела, со нова вредност, со нова универзална цивилизациска придобивка.
- Сигурен сум дека ќе успееме во тоа, заклучи македонскиот премиер.