Скопје, 7 октомври 2010 (МИА) - На регионалниот пат Скопје – Велес кај селото Петровец утрово во 6 часот и 15 минути се случи сообраќајна незгода во која животот го загубија две лица, а две се задржани на лекување во Клиничката болница во Скопје.
Според соопштението на Министерството за внатрешни работи, во сообраќајката учествувале „југо“ со штипски регистарски таблички, најверојатно управувано од Тони С. (36) од село Горно Коњари – скопско и автобус на ЈСП - Скопје управуван од М.С. (54) од Скопје.
Од здобиените повреди на место починал Тони С. и неговиот сопатник Александар Н. (19) од Скопје, додека сопатникот Г.Ц. (21) од село Горно Коњари е пренесен и задржан на лекување во Клиничката болница во Скопје. Поради здобиени телесни повреди на лекување е задржан и возачот на автобусот.
По наредба на Истражен судија телата на починатите се предадени за обдукција.