Скопје, 14 октомври 2010 (МИА) - Универзитетскиот професор од Тетово Шпент Љуши денеска до Комисијата за лустрација достави документи за тројца државни функционери, со кои наводно се тврди дека биле соработници на тајните служби.
Љуши по предавањето на документите изјави дека ги нашол завчера во дворот на неговиот дом.
-Денеска ја завршив граѓанската должност до Комисијата за лустрација предадов три досиеја. Документите ми беа фрлени во дворот. Завчера ноќта ги најдов. Ги отворив и видов дека станува збор за високи функционери од власта. Тројца се, само Албанци. Од Комисијата за лустрација ништо не ми кажаа, не сакам ништо да коментирам, вели професорот на Тетовскиот универзитет Шпент Љуши.
Имињата на функционерите не беа јавно кажани, бидејќи според законот тоа е забрането.
Од Комисијата за лустрација велат дека не знаат за што точно станува збор и оти по разгледувањето на документите ќе се одлучи како ќе се постапува по нив.