Брисел, 19 октомври 2010 (МИА) - Претседателот на Европскиот совет Херман Ван Ромпуј денеска доаѓа во Скопје на средби со македонскиот државен врв.
Ван Ромпуј ќе се сретне со претседателот Ѓорге Иванов и со премиерот Никола Груевски. Главна тема на разговорите, според најавите, ќе биде претстојниот извештај на Европската комисија за напредокот на Македонија, а се очекува да стане збор и за билатералниот проблем за името со Грција, како клучна пречка за македонската евроитеграција.
Еднодневната посета на Ван Ромпуј на Скопје е во рамките на неговата балканска турнеја. Покрај Македонија, ќе ги посети и Црна Гора, Босна и Херцеговина и Албанија.
Пред посетата, Ван Ромпуј изјави дека Европската унија е посветена на европерспективата на Западен Балкан, но оти очекува зајакната регионална соработка и добрососедски односи бидејќи Унијата не сака да увезува конфликти.
Претседателот на ЕУ додаде дека претстои уште многу да се сработи и оти се потребни интензивни реформи во областа на човековите права, како и продолжување на борбата против корупцијата и организираниот криминал. Брисел, вели Ван Рампуј, во следните две години ќе ја поддржи евроинтеграцијата на земјите од регионот со финансиска помош од две милијарди евра.