Скопје, 25 октомври 2010 (МИА) - Претседателот Ѓорге Иванов од денеска престојува во дводневна официјална посета на Естонија на покана од естонскиот претседател Томас Хендрик Илвес.
Во Талин покрај со Илвес, прв претседател на таа балтичка земја што официјално ја посети Македонија, минатиот октомври, шефот на државата ќе се сретне и со естонскиот премиер Андрус Ансип и со претседателката на Парламентот на Естонија Ен Ергма.
Во македонската делегација ќе биде и министерот за информатичко општество Иво Ивановски, кој ќе оствари средби со претставници на ИКТ-секторот во Естонија, која е меѓу земјите со највисок процент на раширеност на интернет.
Естонија е членка на НАТО и на ЕУ од 2004 година. Македонија и Естонија воспоставија дипломатски односи во 1995 година и имаат неколку билатерални договори.