Скопје, 28 октомври 2010 (МИА) - Средбата на премиерите на Македонија и на Грција Никола Груевски и Јоргос Папандреу што требаше да се одржи денеска во 15:30 часот во Брисел, е презакажана за утре во 14:30 часот, на барање на грчката страна, јави дописникот на МИА.
Одложувањето на средбата е поради активностите на Папандреу на состанокот на Европскиот совет.
Во меѓувреме, македонскиот премиер денеска се сретна со генералниот секретар на НАТО Андерс Фог Расмусен и со претседателот на Владата на Луксембург Жан Клод Јункер. Груевски попладнево во Мисијата на Македонија во Брисел има средба со група европралементарци на која присуствуваат и вицепремиерот за европски прашања Васко Наумовски и министерот за надворешни работи Антонио Милошоски.
Претседателот на македонската Влада денеска ќе се сретне и со високиот претставник на ЕУ за надворешна и безбедносна политика Кетрин Ештон, а утре претпладне и со еврокомесарот за проширување Штефан Филе.