Скопје, 29 октомври 2010 (МИА) - Уставниот суд на Република Македонија денеска ќе избира нов претседател, бидејќи на 1-ви ноември му завршува тригодишниот мандат на актуелниот прв човек на Судот Трендафил Ивановски.
Ивановски за судија на Уставниот суд е избран на 7 мај 2003 година, а претседател на Судот е од 1 ноември 2007 година.
Претседателот на Уставниот суд се избира од редот на судиите со тајно гласање на работна седница. За претседател ќе биде избран кандидатот кој на гласањето ќе добие двотретинско мнозинство, односно шест од девет гласа.
Кандидати за претседател на Уставниот суд можат да бидат судиите Вера Маркова, Бранко Наумоски, Игор Спировски, Зоран Сулејманов, Исмаил Дарлишта, Наташа Габер-Дамјановска и Гзиме Старова.
Судијата Лилјана Ингилизова - Ристова нема право да се кандидира за претседател на Судот, бидејќи ја извршуваше таа функција во период од 2003 - 2006 година.
Мандатот на претседателот на Уставниот суд е три години, без право на реизбор.