Скопје, 8 ноември 2010 (МИА) - Актерот Дејан Лилиќ е избран за директор на Македонскиот народен театар, соопшти денеска Министерството за култура.
Mинистерката за култура Елизабета Канческа-Милевска, врз основа на предлог на Комисијата за селекција на кандидати за избор на директор на НУ Македонски народен театар – Скопје, одлучи дека Лилиќ ги исполнува општите и посебните услови утврдени со Конкурсот, а во согласност со доставената програма за работа и развој на Установата за периодот 2010-2014 година поседува стручни и други квалитети за директор.
- Понудената програма е насочена, пред сè, кон градење на една нова театарска естетика која води кон отворање на нови полиња на театарско дејствување со посебен осврт кон модернизација и осовременување на маркетингот и достапноста на театарот преку глобалните мрежи за комуникација. Во програмата е посветено сериозно внимание на поттикнувањето и промовирањето на современата македонска драматургија преку организирање на јавни читања и конкурси за современи текстови, поставување на најдобриот текст и публикување на најдобрите драми во посебна двојазична едиција заради меѓународно промовирање на нашите драмски автори, се вели во соопштението.
Меѓу другото, наведено е и збогатување на репертоарот со гостување на релевантни театарски куќи од регионот и од Европа кои би биле атрактивни и интересни за публиката, а компаративни за екипите и авторите кои ќе творат во МНТ.
Конкурсот за избор на директор на МНТ беше објавен во весниците „Утрински весник“ и „Коха“.