Ослободени четворица осомничени за убиството на српскиот турист во ОхридОхрид, 12 ноември 2010 (МИА) - Поради недостаток на докази за инволвираност Основното јавно обвинителство во Охрид се откажа од кривичен прогон против четворица од осумтемина осомничени за убиството на српскиот турист Дејан Новаковиќ, кое кон крајот на месец август се случи во центарот на Охрид.
Јане Шокароски, Петар Шенгулоски, Борче Чулукоски и Јован Ѓорески, сите од охридско, се четворицата ослободени од обвинението и се очекува тие вечерва да бидат пуштени дома од притворот што го издржуваа во Истражниот затвор во Скопје.
Во притвор остануваат тројца охриѓани, додека српскиот државјанин за кој постои основано сомнение дека бил вмешан во инцидентот, се уште е недостапен за органите на прогонот.
Адвокатите од одбраната на ослободените се задоволни од одлуката на Обвинителството, од кое се очекува утре и официјално да подигне обвинение за тепачката. Адвокатите на притворените бараат промена на обвинителниот акт кој осомничемните ги товари за свирепо убиство, во обвинение за убиство од небрежност за што максималната казна затвор изнесува до пет години.
|