Скопје, 22 ноември 2010 (МИА) - Интензивни врнежи од дожд и засилен ветер се очекува да ја зафатат земјава во попладневните часови, најавуваат од Управата за хидрометеоролошки работи.
Во западните делови се очекува да наврнат до 30 литри на метар квадратен. Попладне и во текот на ноќта ќе дува засилен повремено силен ветер од југоисточен правец. Воздушниот притисок значително ќе опадне за околу 10 мерни единици.
Вечер и утре изутрина на места ќе има интензивен дожд проследен со појава на грмежи и силен ветер кој на моменти ќе достигнува брзина околу 80 км/ч.
Во текот на утрешниот ден врнежите ќе бидат пообилни во источните подрачја.
Од среда до крајот на неделава ќе преовладува променливо облачно и посвежо време со повремени локални врнежи од дожд, а на планините снег.