Белград, 6 декември 2010 (МИА) - Добрата соработка со Србија и со останатите соседни земји е еден од приоритетите на Македонија, вели македонскиот премиер Никола Груевски во денешното интервју за „Б-92“.
- Меѓу двете земји постои нормална комуникација, одлична економска и политичка соработка, кои можат да бидат уште подобри, оценува Груевски.
Цел на Македонија, посочува, е што побрза интеграција во НАТО и ЕУ, но на тој пат има голем проблем наметнат од Грција во врска со уставното име.
Прашан за идејата на српскиот претседател Борис Тадиќ во регионот да се воспостави „скандинавски модел“ на соработка со заеднички дипломатски претставништва, Груевски оценува дека тоа не е лоша идеја, но оти е потребно претходно добро да се анализира.
За протестите на опозициската СДСМ во Скопје, македонскиот премиер вели дека не е загрижен и оти легитимно право на опозицијата е да протестира и да бара предвремени избори, но оти легитимноста на актуелната власт е потврдена неколкупати со убедливи изборни победи.
- На многу регуларни избори победивме уште во 2005, на локалните избори, и 2006 на парламентарните избори. Победивме и тоа убедливо и на вонредните парламентарни избори во 2008. Сегашната опозиција немаше никакви негативни коментари околу организацијата на изборите, а меѓународните институции не рекоа дека победата на ВМРО-ДПМНЕ е нерегуларна, туку напротив дека победивме сосема легитимно, изјави премиерот Никола Груевски во интервјуто за Б92.