Скопје, 11 јануари 2011 (МИА) - Скопскиот аеродром „Александар Велики“ денеска е отворен за полетувања и за слетувања, а нормално функционира и охридскиот „Св. Апостол Павле“.
Како што информираат од аеродромот, утрово слетал авионот од Подгорица, а се очекува и негово полетување.
Аеродромот во Скопје од петокот беше затворен поради намалена видливост од густата магла. Дел од авионите се враќаа, а дел се пренасочуваа кон охридскиот аеродром.
Маглата не предизвикува поголеми проблеми во одвивањето на патниот сообраќај. Од АМСМ информираат дека сообраќајот на сите магистрални и регионални патни правци низ државата се одвива тековно, по главно влажни коловози во утринските часови. Намалена видливост има на патните правци Тетово - 20 метри, Штип - 100 метри, Сарамзалино - 100 метри, Неготино - 150 метри, Битола - 100 метри, Прилеп - 100 метри, Струга - 40 метри, Кичево - 200 метри, Делчево - 50 метри, Велес - 30 метри и Кула - 100 метри.