Скопје, 17 јануари 2011 (МИА) - Осум македонски државјани синоќа се евакуирани од Тунис. Тие заедно со група српски државјани околу 21 часот со специјален лет на ЈАТ пристигнаа на аеродромот во Белград, каде што ги пречека македонскиот конзул Александар Новотни.
Во текот на денот со уште еден вонреден лет што го организираат МНР на Србија и ЈАТ, се очекува од Тунис да бидат евакуирани и преостанатите седум македонски граѓани, кои заедно со осуммината веќе пристигнати, вчера побараа помош од Амбасадата на Македонија во Каиро.
Петнаесетте Македонци кои досега побарале помош не се се туристи, туку подолг период работеле во Тунис.
Од причина што Македонија нема своја амбасада во Тунис, нивната евакуација се организира во асистенција со српската амбасада во таа земја.
Во МНР велат дека се во постојан контакт со македонската амбасада во Каиро и српската амбасада во Тунис со цел што побрзо и побезбедно враќање на македонските државјани во Република Македонија.