Скопје, 17 јануари 2011 (МИА) - Уште четворица македонски државјани се вратија од Тунис и со вонреден лет на ЈАТ организиран од МНР на Србија попладнево пристигнаа на аеродромот во Белград.
Тие, како и осуммината државјани на РМ кои стигнаа со синоќешниот специјален лет на ЈАТ, побарале од Амбасадата на Македонија во Каиро да бидат евакуирани од Тунис.
Беа пречекани од конзулот на Македонија во Србија Александар Новотни. Во добра здравствена состојба се и вечерва ќе останат во Белград зашто нема слободни места на летот за Скопје.
Како што информира Министерството за надворешни работи, четири члена на едно семејство од Македонија решиле да останат во Тунис, иако претходно и тие побарале помош од Амбасадата во Каиро. Оцениле дека состојбата се смирува и дека можат да останат во таа африканска земја.
Македонците што се обратиле во Амбасадата за помош не се туристи, туку подолг период работеле во Тунис.
Македонија нема своја амбасада во Тунис, така што нивната евакуација се организира во асистенција со српската амбасада во таа земја.