Струмица, 22 февруари 2010 (МИА) – Братот близнак на трагично загинатиот претседател на Република Македонија Борис Трајковски – Александар, седум години по авионската несреќа кај Мостар, изјави дека врз неговиот брат бил извршен атентат, оти тој некому му пречел со неговата работа и искреност.
Изјавата Александар ја даде денеска пред споменикот „Македонија“ на испраќањето на дваесетина планинари од Струмица, Радовиш, Неготино и Гевгелија кои наредните денови ќе пешачат околу 200 километри до гробот на Трајковски во Бутел, каде што во сабота на 26 февруари ќе му оддадат почит на претседателот.
- Загинувањето на брат ми Борис е трагедија за семејството и за Македонија. Според мене, врз него беше извршен атентат бидејќи тој некому му пречеше со неговата работа, искреност и успеси, поради што физички беше отстранет, изјави Александар, не прецизирајќи кој би можел да биде убиецот или убијците на претседателот Трајковски.
Братот близнак потврди дека контактирал со истражителот на Советот на Европа Андреас Грос кој поведе истрага за авионската несреќа кај Мостар.