Скопје, 23 февруари 2011 (МИА) - Претседателот на Државната изборна комисија Александар Новаковски денеска поднесе оставка до претседателот на Собранието Трајко Вељаноски.
- Со оглед дека со последните случувања во целост е загрозена мојата непристрасност и доверба, која мора да ја има секој претседател на Државната изборна комисија, сметам дека треба да се повлечам од оваа функција во интерес на заштита на кредибилитетот на ДИК и мојот досегашен професионален ангажман, се вели, меѓу другото, во оставката доставена до спикерот Вељаноски.
Новаковски посочува дека за време на својот мандат во ДИК, го вложил сиот свој капацитет и знаење да придонесе за создавање на сите неопходни услови за регулирање на изборниот процес, особено во насока на одржување фер и демократски избори.
- Државната изборна комисија во овој период ги исполни сите предвидени цели и создаде услови и капацитети за успешно спроведување на сите предизвици односно дека е подготвена стручно да спроведе избори кога Собранието на Република Македонија ќе одлучи за тоа, вели во оставката Новаковски.
Александар Новаковски е член на ДИК од 2005, а на оваа функција е избран во 2006 година. Тој на оваа позиција дојде како предлог на опозицијата.