Скопје, 24 февруари 2011 (МИА) - Претседателот на Собранието Трајко Вељаноски за утре закажа седница на Собранието на која ќе отпочне постапка за избор на нов претседател на Државната изборна комисија.
- Во интерес на непречено функционирање на Државната изборна комисија во полн состав, согласно предвидените процедури и во насока на создавање на сите претпоставки за одржување на фер и демократски избори, за утрешниот ден закажав седница на која ќе отпочне постапка за избор на нов претседател на Државната изборна комисија. Постапката ќе трае согласно предвидените законски рокови, се вели во писмената изјава од претседателот на Собранието Вељаноски.
По вчерашната оставка на претседателот на ДИК Александар Новаковски, со работата на Државната изборна комисија во моментов раководи заменикот - претседател на Комисијата Субхи Јакупи.
- Истовремено, според оценката на претседателот на ДИК во оставка, Државната изборна комисија располага со капацитет за успешно совладување на сите предизвици и е подготвена стручно да спроведе избори кога Собранието на Република Македонија ќе одлучи за тоа, наведува Вељаноски.