Скопје, 28 февруари 2011 (МИА) - Од месечината освен Кинескиот ѕид се гледа и стравот на Бранко Црвенковски од предвремени избори. Условите што денес ги има со Законот за избори се подобрени во однос на 2006 година, а ние ќе направиме се изборите да бидат фер и демократски, изјави денеска во Скопје премиерот Никола Груевски.
- Апсолутно, ние ќе направиме се што е во наша моќ изборите да бидат фер и демократски и такви и ќе бидат. Ние ќе поканиме и странски набљудувачи да ги мониторираат изборите во што е можно поголем број. Но, она што сакам да го испратам како порака до Бранко Црвенковски и до СДСМ е дека во 2006 година ние имавме полош од овој Закон за избори, затоа што законот се подобри со измените во 2008, а треба уште еднаш да се подобри со новата измена што ќе ја направиме, па сепак победивме, рече Груевски по отпочнувањето со изградба на катна гаража кај Судска палата.
- Ние имавме во тоа време ситуација кога министерот за правда беше член на Судскиот совет, па сепак победивме. Ние имавме ситуација кога избирачкиот список не беше прочистен во 2006 па сепак го победивме СДСМ. Значи, во многу полоши услови од овие што се денеска, од позиција на опозиција во 2006 година ВМРО-ДПМНЕ победи на тие избори. Нека не се вадат дека ете нешто не чинело, да се подобрело и тоа ќе било услов за бојкот итн. Се гледа од месечината, освен кинескиот ѕид и стравот на Бранко Црвенковски. Поочигледно од ова што го прават да се види нема во Република Македонија и пошироко, додаде Груевски.