Скопје, 8 март 2011 (МИА) - Претседателот на Собранието Трајко Вељаноски денеска согласно законските одредби, ја доставил листата на пријавени кандидати за претседател на Државната изборна комисија до Социјалдемократскиот сојуз на Македонија.
- Очекувам, во законски предвидениот рок од три дена, СДСМ до мене да достави предлог за претседател на Државната изборна комисија, кој заеднички ќе биде изгласан на седницата на Собранието на Република Македонија закажана за 15 март 2011 година и со што ќе исполниме значајна претпоставка за одржување на фер и демократски предвремени избори, се наведува во писмената изјава на претседателот на Собранието.
СДСМ информираше дека во следните два дена ќе донесе одлука кој од кандидатите за претседател на ДИК ќе го поддржи.
Комисијата за избори и именувања денеска ја констатира листата на кандидати кои ги исполнуваат условите за претседател на ДИК и ја препрати до претседателот на Собранието Трајко Вељаноски. Сите седум пријавени кандидати ги исполнуваат условите за претседател на највисокото изборно тело.
На листата се Розита Џартовска, адвокат, Милан Тонески, правник, Тања Алтанџиева, член на ДИК и правник, предложена од СДСМ и Борис Кондарко, адвокат и поранешен пратеник од СДСМ и член на ДИК, Арбен Гоља, адвокат, Лазар Трајчев, адвокат и Влатко Сајковски, актуелен член на ДИК.