Скопје, 16 март 2011 (МИА) - Донесување Изборен закон со консензус на сите релевантни парламентарни партии, контрола на прочистување на Избирачкиот список, усвојување на закон за рамномерност на буџетските кампањи во медиумите и одблокирање на сметките на А1, Време, Шпиц и Коха е ре, се четирите барања кои треба да обезбедат услови за одржување на слободни, фер и демократски предвремени избори, рече на денешната прес-конференција пратеникот на СДСМ Јани Макрадули.
Тој ги негира изјавите дека на вчерашната средба на премиерот и лидер на ВМРО-ДПМНЕ Никола Груевски и претседателот на СДСМ Бранко Црвенковски, владејачката партија прифатила 40-50 барања на опозицијата. Макрадули посочи дека не се прифатени нивните барања за одблокирање на сметките и за закон за регулирање на рекламирањето на Владата со буџетски средства. За Изборниот закон, не е прифатено барањето за зголемување на бројот на претставниците на политичките партии во избирачките одбори и законски да се зголеми потребниот стаж за претседателите на избирачките одбори.
- За избирачкиот список не го прифати нашиот рок од 30 дена, за целосна контрола на прочистувањето, иако овој рок овозможува одржување на изборите на пролет. Не ги прифатија нашите барања за допрецизирање на гласањето на дијаспората, особено како ќе го остварат своето право на глас, членовите на избирачките одбори од Македонија, кои ќе бидат испратени по светот. За барањето за загарантирани места на помалите етнички заедници, и другите барања за избирачкиот процес, признаа дека не може да гарантираат целосна имплементација, додека не се согласат и останатите поголеми парламентарни партии, рече Макрадули.
Тоа, вели, потврдува дека е потребно да се одржи средба на која ќе учествуваат лидерите на релевантните политички партии.
- СДСМ останува на ставот дека пред враќањето во Собранието, треба да се усогласиме за сите прашања поврзани со изборниот процес, и по усвојувањето на сите акти да се оди на слободни, фер и демократски предвремни избори, изјави Јани Макрадули.