Атина, 15 април 2011 (МИА) - Шефот на грчката дипломатија Димитрис Друцас протестирал кај неговиот унгарски колега Јанош Мартоњи поради вчерашната изјава на премиерот на Унгарија Виктор Орбан на конференцијата за Западен Балкан во Брисел дека е апсурдно да се блокира Македонија поради билатералниот проблем за името со Грција и оти земјата треба да ги почне пристапните преговори со ЕУ.
Друцас, како што пренесува грчката агенција АНА-МПА, на маргините од министерскиот состанок на НАТО во Берлин, му кажал на Мартоњи дека Унгарија како претседавач со ЕУ треба да се држи до институционалните рамки и договори на ЕУ. Будимпешта треба да ги почитува едногласно донесените одлуки на Советот на ЕУ и да разбере дека кога зборува за прашањето за името тоа треба да го прави како претставник на ЕУ и сите нејзини членки, рекол Друцас.
Унгарскиот премиер Орбан вчера на конференција за Западен Балкан во Брисел побара Македонија да ги почне преговорите за членство во ЕУ и покрај нерешениот спор за името.
- Што се однесува до Македонија, тоа е еден од најтешките проблеми, ако треба да го окарактеризирам, ќе кажам дека е чист апсурд. Дури и како претседавач на Советот на ЕУ треба да размислувам како да се обратам, треба да размислувам дали смеам да кажам Македонија, или треба да користам ПЈРМ, тоа е апсурдно. Ако една земја ги исполнува условите, задачите, треба да и се даде шанса на земјата да ги започне преговорите, а после да најде договор со земјата членка. Да не дозволуваме преговори поради политички конфликт е несреќна политичка стратегија. Со Македонија треба да започнеме преговори, истакна Виктор Орбан.