Скопје, 6 јуни 2011 (МИА) - Две лица загинаа, а седум се повредени во тешка сообраќајна несреќа што се случи ноќеска еден часот по полноќ на магистралниот пат Куманово – Крива Паланка кaj Страцин.
Како што соопшти МВР, во сообраќајката помеѓу возила „лада рива“, управувано од З.С. (45) од Крива Паланка и „рено 19“, управувано од Б.Т. (34) од Куманово, на самото место починале сопатниците на З.С., Десанка Ц. (42) и нејзината ќерка Фросина Ц. (22), додека повредени се возачот, сопатничката С.К. (34) и нејзината малолетна ќерка, сите од Крива Паланка.
Со повреди се здобиле и Б.Т., неговата сопруга М.Т. и нивните две малолетни деца од Куманово, по што сите повредени се пренесени на лекување во Скопје.
Извршен е увид на местото и се работи на утврдување на причините за сообраќајката.