Велес, 8 јуни 2011 (МИА) - Во градот на поетот и револуционер Коста Солев Рацин, Велес денеска и утре ќе се одржат 48. Рацинови средби.
Средбите, традиционално ќе започнат на Спомен-костурницата и на двата споменика на Рацин во Велес, каде беседа ќе одржи поетот Ристо Лазаров.
Свеченото отворање на Рациновите средби е вечерва во 21 часот во Младинскиот парк. Беседа за Рацин ќе одржи професорот Ѓорѓи Сталев, по што ќе се одржи меѓународниот поетски митинг на кој ќе учествуваат осум поети од странство и тоа од Романија, Грција, Бугарија, Србија и Украина, како и 14 поети од Македонија, од кои четворица од Велес.
На отворањето на Рациновите средби ќе настапат и маестро Борис Трајанов и велешкиот идол Мики Секуловски.
На средбите ќе има и грнчарска работилница во Музеј спомен-куќата на Рацин и Симпозиум на тема „Прозата на Рацин‘‘.
Средбите ќе завршат утревечер со програмата „Мугра“, кога за Рацин ќе зборува проф. Златко Кујунџиќ, македонист, актуелен хрватски амбасадор во Република Македонија и добитник на Почесното Рациново признание за 2011 година.
Ќе бидат доделени и Рациновите награди - Рациновото признание за 2011 на писателот Владимир Попов и Почесното Рациново признание на проф. Златко Кујунџиќ. Вечерта ќе биде збогатена со настапот на Зоран Џорлев и неговиот оркестар.
Како новина на средбите првпат ќе учествува невладиниот сектор од Велес и здружението „Разбој‘‘, литературниот клуб „Кочо Рацин‘‘, ученици од велешките училишта и вработени во музејот и театарот. Првпат на Рациновите средби ќе се промовира и ќе се крене знамето на Рациновите средби во жолто-кафена боја на кое е прикажан Рацин и неговиот потпис.